ਮੰਦੀ ਕਾਰਨ ਜੋਤਿਸ਼ ਦਾ ਸਿਤਾਰਾ ਚਮਕਿਆ

( ਇੰਦਰਦੀਪ ਸਿੰਘ ਦੂਰਦਰਸ਼ਨ ਸਣੇ ਪੰਜਾਬੀ ਦੇ ਕਈ ਟੀ.ਵੀ ਚੈਨਲਾ ਤੇ ਐਂਕਰ ਤੇ ਨਿਊਜ਼ ਰੀਡਰ ਵੱਜੋਂ ਕੰਮ ਕਰਦਾ ਆ ਰਿਹਾ ਹੈ। ਪਰ ਵਧੀਆਂ ਗੱਲ ਇਹ ਹੈ ਕਿ ਇੰਦਰ ਕੇਵਲ ਖਬਰਾਂ ਰੀਡ ਹੀ ਨਹੀਂ ਕਰਦਾ ਸਗੋਂ ਖਬਰਾਂ ਤੇ ਆਲੇ ਦੁਅਲੇ ਦੇ ਸੰਸਾਰ ਦੀ ਪੁਣਛਾਣ ‘ਚ ਪੂਰੀ ਤਰਾਂ ਸਮਰੱਥ ਹੈ। ਜੋਤਿਸ਼ ਦੇ ਬਾਰੇ ਅਹਿਮ ਚਰਚਾਂ ਕਰਦਾ ਇਹ ਲੇਖ ‘ਚ ਜਿਥੇ ਇਸ ਗੋਰਖ ਧੰਦੇ ਦਾ ਪ੍ਰਚਾਰ ਕਰ ਰਹੀਆਂ ਸਰਕਾਰਾਂ, ਸਿਅਸੀ ਲੋਕਾਂ ਤੇ ਖਿਡਾਰੀਆਂ ਦੀ ਖਬਰ ਲੈਦਾਂ ਹੈ ਉਥੇ ਹੀ ਆਪਣੇ ‘ਮੀਡੀਆਂ’ ਵਾਲਿਆਂ ਨੂੰ ਵੀ ਨਹੀਂ ਬਖਸਦਾ। ਆਸ ਹੈ ਕਿ ਬਲੋਗ ਤੇ ਫੇਰੀ ਪਾਉਣ ਵਾਲਾ ਹਰ ਸੱਜਣ ਇੰਦਰ ਦੇ ਇਸ ਪਲੇਠੇ ਲੇਖ ਤੇ ਗੌਰ ਫਰਮਾਏਗਾ-ਤੇਜਾ)

ਸਾਲ 2009 ਦੇ ਸ਼ੁਰੂਆਤੀ ਦੌਰ ਵਿੱਚ ਹੀ ਆਰਥਿਕ ਮੰਦੀ ਨੇਂ ਭਾਰਤ ਸਮੇਤ ਪੂਰੀ ਦੁਨੀਆ ਨੂੰ ਘੇਰ ਲਿਆ।ਆਰਥਿਕ ਮੰਦੀ ਦੇ ਇਸ ਦੌਰ ਨੇ ਇੱਕ ਵਾਰ ਫਿਰ ਉਹ ਕਹਾਵਤ ਸੱਚ ਕਰ ਵਿਖਾਈ ਹੈ ਕਿ ਕਣਕ ਨਾਲ ਘੁਣ ਵੀ ਪੀਸਿਆ ਜਾਂਦਾ ਹੈ।ਅਮਰੀਕਾ ਵਰਗੇ ਵਿਕਸਿਤ ਦੇਸ਼ ਤੇ ਛਾਏ ਆਰਥਿਕ ਮੰਦੀ ਦੇ ਬੱਦਲਾਂ ਨੇ ਭਾਰਤ ਵਰਗੇ ਕਈ ਹੋਰ ਵਿਕਾਸਸ਼ੀਲ ਦੇਸ਼ਾਂ ਨੂੰ ਵੀ ਆਪਣੀ ਚਪੇਟ ਵਿੱਚ ਲੈ ਲਿਆ।ਤਕਰੀਬਨ 6 ਕੁ ਮਹੀਨੇ ਬੀਤ ਜਾਣ ਬਾਅਦ ਵੀ ਹੁਣ ਕਈ ਦੇਸ਼ਾਂ ਵੱਲ ਇਹ ਕਿਆਸ ਅਰਾਈਆਂ ਲਗਾਈਆਂ ਜਾ ਰਹੀਆਂ ਹਨ ਕਿ ਇਸ ਭਿਆਨਕ ਦੌਰ ਵਿੱਚੋ ਨਿਕਲਣ ਲਈ 2-3 ਸਾਲਾਂ ਦਾ ਸਮਾ ਲੱਗਣਾ ਤਾਂ ਮਾਮੂਲੀ ਜਿਹੀ ਗੱਲ ਹੈ।ਮੰਦਵਾੜੇ ਦੇ ਇਸ ਦੌਰ ਨੇ ਹਰ ਇੱਕ ਵਪਾਰ ਨੂੰ ਸਿੱਧੇ ਜਾਂ ਅਸਿੱਧੇ ਰੂਪ ਵਿੱਚ ਫਰਕ ਜ਼ਰੂਰ ਪਾਇਆ ਹੈ।..........ਪਰ ਅਜਿਹੀ ਸਥਿਤੀ ਵਿੱਚ ਭਾਰਤੀ ਮੂਲ ਦਾ ਹੀ ਇੱਕ ਅਜਿਹਾ ਧੰਦਾ ਵੀ ਹੈ ਜਿਸ ਉੱਤੇ ਇਸ ਮੰਦਵਾੜੇ ਦਾ ਕੋਈ ਅਸਰ ਨਹੀਂ ਹੋਇਆ।ਬਲਕਿ ਇਸ ਮੰਦਵਾੜੇ ਦੇ ਕਾਰਨ ਹੀ ਇਸ ਧੰਦੇ ਨੇ ਦਿਨ ਦੁੱਗਣੀ ਤੇ ਰਾਤ ਚੌਗੁਣੀ ਤਰੱਕੀ ਕੀਤੀ ਹੈ, ਤੇ ਉਹ ਧੰਦਾ ਹੈ ਜੋਤਿਸ਼ ਦਾ।ਇੱਕ ਸਰਵੇਖਣ ਮੁਤਾਬਿਕ ਸਾਲ 2006 ਵਿੱਚ ਭਾਰਤ ਵਿੱਚ ਜੋਤਸ਼ੀਆਂ ਦਾ ਕਾਰੋਬਾਰ 10 ਹਜ਼ਾਰ ਕਰੋੜ ਰੁਪਏ ਸੀ, ਜੋ ਦਸੰਬਰ 2008 ਵਿੱਚ ਵੱਧ ਕੇ 40 ਹਜ਼ਾਰ ਕਰੋੜ ਰੁਪਏ ਤੱਕ ਪੁੱਜ ਗਿਆ।ਅਮਰੀਕਾ ਵਿੱਚ ਵੀ ਜੋਤਸ਼ੀਆਂ ਦੇ ਵਪਾਰ ਸੰਬੰਧੀ ਆਂਕੜੇ ਹੈਰਾਨੀਜਨਕ ਹਨ।ਸਾਲ 2006 ਵਿੱਚ 10 ਕਰੋੜ ਡਾਲਰ ਦਾ ਕਾਰੋਬਾਰ ਹੁਣ 20 ਕਰੋੜ ਡਾਲਰ ਤੱਕ ਪਹੁੰਚ ਚੁੱਕਾ ਹੈ।
ਇਸ ਪਿੱਛੇ ਕਾਰਨ ਇੱਕ ਹੀ ਹੈ ਤੇ ਉਹ ਹੈ ਮੰਦੀ ਤੋ ਜਲਦੀ ਨਿਜਾਤ ਪਾਉਣ ਲਈ ਆਮ ਆਦਮੀ ਤੋ ਲੈ ਕੇ ਵੱਡੇ ਵੱਡੇ ਉਦਯੋਗਪਤੀ ਵੀ ਇਹਨਾਂ ਦੇ ਚੱਕਰ ਕੱਟ ਰਹੇ ਹਨ।ਮੰਦੀ ਤੋ ਛੁਟਕਾਰਾ ਪਾਉਣ ਲਈ ਉਪਾਅ ਕਰਵਾਉਣ ਵਾਲੇ ਲੋਕ ਫਿਰ ਇਹਨਾਂ ਜੋਤਸ਼ੀਆਂ ਨੂੰ ਮੂੰਹ ਮੰਗੀ ਕੀਮਤ ਵੀ ਦੇ ਰਹੇ ਹਨ।ਫਿਰ ਸੋਚਣ ਵਾਲੀ ਗੱਲ ਇਹ ਹੈ ਕਿ ਜੇ ਅਜਿਹੇ ਸਮੇ ਵਿੱਚ ਵੀ ਕਿਸੇ ਨੂੰ ਮੂੰਹ ਮੰਗੀ ਰਕਮ ਮਿਲ ਜਾਵੇ ਤਾਂ ਫਿਰ ਕੋਈ ਮੰਦੀ ਦਾ ਸ਼ਿਕਾਰ ਕਿਵੇਂ ਹੋ ਸਕਦਾ ਹੈ।ਇਸੇ ਤਰਾਂ ਹੁਸ਼ਿਆਰੀ ਵਰਤਦੇ ਹੋਏ ਜੋਤਸ਼ੀਆਂ ਨੇ ਆਪਣੇ ਆਪ ਨੂੰ ਅਜਿਹੇ ਦੌਰ ਤੋ ਬਚਾਈ ਰੱਖਿਆ ਹੈ।ਉਪਰੋਕਤ ਦਿੱਤੇ ਆਂਕੜਿਆਂ ਨੂੰ ਵੇਖ ਤਾਂ ਸਹਿਜੇ ਹੀ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ ਕਿ ਜੋਤਸ਼ੀਆਂ ਨੂੰ ਇੰਨਾ ਪੈਸਾ ਦੇ ਕੇ ਕੋਈ ਇਸ ਦੌਰ ਵਿੱਚੋ ਨਿਕਲ ਰਿਹਾ ਹੈ ਜਾਂ ਫਿਰ ਮੰਦੀ ਦੀ ਇਸ ਦਲਦਲ ਵਿੱਚ ਹੋਰ ਡੂੰਘਾ ਫਸਦਾ ਜਾ ਰਿਹਾ ਹੈ।
ਇਸ ਪਿੱਛੇ ਗਲਤੀ ਜੋਤਸ਼ੀਆਂ ਦੀ ਨਹੀਂ ਸਗੋ ਆਮ ਆਦਮੀ ਦੀ ਹੈ ਜੋ ਵਿਗਿਆਨਿਕ ਦੌਰ ਦੇ ਚੱਲਦਿਆਂ ਵੀ ਵਿਗਿਆਨ ਤੋ ਕੋਹਾਂ ਦੂਰ ਹੋ ਵਹਿਮਾ ਭਰਮਾ ਵਿੱਚ ਫਸਿਆ ਬੈਠਾ ਹੈ।ਜੇ ਭਾਰਤ ਦੇ ਜੋਤਸ਼ੀ ਇੰਨੇ ਹੀ ਸ਼ਕਤੀਸ਼ਾਲੀ ਹਨ ਜਿਹੜੇ ਲੋਕਾਂ ਦੀਆਂ ਸਮੱਸਿਆਵਾਂ ਦਾ ਹੱਲ ਮਿੰਟਾਂ ਵਿੱਚ ਹੀ ਕਰ ਸਕਦੇ ਹਨ ਤਾਂ ਫਿਰ ਉਹਨਾਂ ਜੋਤਸ਼ੀਆਂ ਤੋ ਇਹ ਪੁੱਛਣਾ ਬਣਦਾ ਹੈ ਕਿ ਉਨਾਂ ਭਾਰਤ ਉੱਤੇ ਇਸ ਮੰਦੀ ਨੂੰ ਆਉਣ ਹੀ ਕਿਉਂ ਦਿੱਤਾ? ਇਸਦਾ ਹੱਲ ਪਹਿਲਾਂ ਹੀ ਕਿਉਂ ਨਹੀ ਕੀਤਾ ਗਿਆ?
ਸੱਭਿਆਚਾਰਕ ਵਿਭਾਗ ਜਲੰਧਰ ਜ਼ੋਨ ਦੇ ਮੁਖੀ ਰਾਜੂ ਸੋਨੀ ਮੁਤਾਬਿਕ ਜੋਤਸ਼ੀਆਂ ਦੇ ਕਾਰੋਬਾਰ ਨੂੰ ਚੜਦੀ ਕਲਾ ਵਿੱਚ ਰੱਖਣ ਲਈ ਇੱਕ ਹੋਰ ਗੱਲ ਨੇ ਬੜਾ ਸਾਥ ਦਿੱਤਾ ਹੈ , ਤੇ ਉਹ ਗੱਲ ਹੈ ਭਾਰਤ ਵਿਚਲੀ ਅਨਪੜਤਾ। ਜੇ ਅੱਜ ਵੀ ਸਰਵੇਖਣ ਕਰ ਲਿਆ ਜਾਵੇ ਤਾਂ 90 ਫੀਸਦੀ ਤੋਂ ਵੀ ਵੱਧ ਭਾਰਤੀ ਅਨਪੜ ਹੀ ਸਾਹਮਣੇ ਆਉਣਗੇ। ਇੱਥੇ ਜ਼ਿਕਰਯੋਗ ਹੈ ਕਿ ਇਹ ਉਹ ਅਨਪੜ ਨਹੀਂ ਹਨ ਜਿਨਾਂ ਨੇ ਸਕੂਲੀ ਵਿੱਦਿਆ ਗ੍ਰਹਿਣ ਨਹੀਂ ਕੀਤੀ ਬਲਕਿ ਇਹ ਤਾਂ ਉਹ ਅਨਪੜ ਹਨ ਜਿਨਾਂ ਸਕੂਲਾਂ ਕਾਲਜਾਂ ਤੋ ਇਲਾਵਾ ਯੂਨੀਵਰਸਿਟੀਆਂ ਤੱਕ ਤੋ ਵੀ ਵਿੱਦਿਆ ਪ੍ਰਾਪਤ ਤਾਂ ਕੀਤੀ ਹੈ। ਪਰ ਕਦੀ ਤਰਕ ਨਾਲ
ਗੱਲ ਕਰਨ ਅਤੇ ਚੀਜ਼ਾਂ ਦੀ ਘੋਖ ਕਰਨ ਦੀ ਵਿੱਦਿਆ ਪ੍ਰਾਪਤ ਨਹੀ ਕੀਤੀ। ਇਹਨਾਂ ਪੜੇ ਲਿਖੇ ਅਨਪੜਾਂ ਦੀ ਜ਼ਿੰਦਗੀ ਤਾਂ ਉਨਾਂ ਅਨਪੜਾਂ ਨਾਲੋ ਵੀ ਬਦਤਰ ਹੈ। ਜਿਨਾਂ ਕਦੀ ਕਿਤਾਬਾਂ ਨੂੰ ਹੱਥ ਨਹੀਂ ਲਾਇਆ। ਕਿਉਂਕਿ ਉਹ ਲੋਕ ਤਾਂ ਨਾ ਪੜਨ ਕਰਕੇ ਅਨਪੜ ਹਨ ਪਰ ਇਹ ਲੋਕ ਪੜੇ ਲਿਖੇ ਹੋ ਕੇ ਵੀ ਆਪਣੇ ਕੰਮਾਂ ਕਰਕੇ ਅਨਪੜ ਹਨ।

ਭਾਰਤੀ ਸੰਵਿਧਾਨ ਦੇ ਅਨੁਛੇਦ 51 ਏ ਦੇ ਤਹਿਤ ਇਹ ਹਰ ਇੱਕ ਭਾਰਤੀ ਨਾਗਰਿਕ ਦਾ ਮੌਲਿਕ ਫਰਜ਼ ਹੈ ਕਿ ਉਹ ਵਹਿਮਾਂ ਭਰਮਾਂ ਨੂੰ ਛੱਡ ਵਿਗਿਆਨਕ ਪਹੁੰਚ ਨੂੰ ਵੱਧ ਵੱਧ ਉਤਸ਼ਾਹਿਤ ਕਰੇ।ਪਰ ਲੋਕਾਂ ਦੁਆਰਾ ਸਰਕਾਰ ਬਣਾਉਣ ਲਈ ਚੁਣੇ ਗਏ ਨੁਮਾਂਇੰਦੇ ਹੀ ਜੇ ਆਪਣੇ ਮੌਲਿਕ ਫਰਜ਼ ਭੁੱਲ ਕੇ, ਤੇ ਵਹਿਮਾਂ ਦੀ ਦਲਦਲ ਵਿੱਚ ਫਸੇ ਘਰਾਂ ਵਿੱਚ ਖੂਹ ਪੁਟਾਉਂਦੇ ਫਿਰਨਗੇ ਤਾਂ ਫਿਰ ਦੇਸ਼ ਦੀ ਬਾਕੀ ਜਨਤਾ ਦਾ ਹਾਲ ਕੀ ਹੋਵੇਗਾ ਇਸ ਗੱਲ ਤੋਂ ਇਸਦਾ ਵੀ ਸਹਿਜੇ ਹੀ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ।ਜੇ ਦੇਸ਼ ਦੀ ਸਰਕਾਰ ਹੀ ਸੰਵਿਧਾਨ ਦੀ ਪਾਲਣਾ ਨਹੀਂ ਕਰੇਗੀ ਤਾਂ ਭਲਾ ਆਮ ਆਦਮੀ ਇਸ ਲਈ ਪਹਿਲ-ਕਦਮੀ ਕਿਉਂ ਕਰੇਗਾ।
ਅੱਜ ਦੇਸ਼ ਦੀ ਵਧੇਰੇ ਜਨਤਾ ਇਨਾਂ ਵਹਿਮਾਂ ਭਰਮਾਂ ਵਿੱਚ ਫਸੀ ਹੋਈ ਹੈ।ਦੇਖਿਆ ਜਾਵੇ ਤਾਂ ਇਸ ਪਿੱਛੇ ਸਭ ਤੋ ਵੱਡਾ ਰੋਲ ਮੀਡੀਆ ਨੇ ਹੀ ਅਦਾ ਕੀਤਾ ਹੈ।ਜੋਤਸ਼ੀਆਂ ਦੇ ਕਾਰੋਬਾਰ ਨੂੰ ਪ੍ਰਫੁੱਲਿਤ ਕਰਨ ਵਿੱਚ ਸਭ ਤੋ ਵੱਡਾ ਯੋਗਦਾਨ ਪਾਇਆ ਹੈ ਅਖਬਾਰਾਂ ਅਤੇ ਟੀ ਵੀ ਚੈਨਲਾਂ ਨੇ।ਸਵੇਰ ਵੇਲੇ ਤਾਂ ਲਗਭਗ ਸਾਰੇ ਹੀ ਟੀ ਵੀ ਚੈਨਲਾਂ ਤੇ ਜੋਤਸ਼ੀਆਂ ਦਾ ਬੋਲਬਾਲਾ ਹੁੰਦਾ ਹੈ ਅਤੇ ਸਾਡੇ ਵਰਗੇ ਲੋਕ ਉਨਾਂ ਪ੍ਰੋਗਰਾਮਾਂ ਨੂੰ ਵੇਖ ਚੈਨਲਾਂ ਦੀ ਟੀ.ਆਰ.ਪੀ ਵਧਾਉਂਦੇ ਹਨ।ਇਸ ਤੋ ਇਹ ਸਿੱਧ ਹੋ ਜਾਂਦਾ ਹੈ ਕਿ ਉਕਤ ਚੈਨਲ ਦਾ ਇਹ ਪ੍ਰੋਗਰਾਮ ਕਿੰਨਾ ਕੁ ਲੋਕਪ੍ਰਿਅ ਹੈ।ਜਦੋ ਜੋਤਸ਼ੀਆਂ ਦੇ ਕਿਸੇ ਪ੍ਰੋਗਰਾਮ ਵੇਲੇ ਕਿਸੇ ਚੈਨਲ ਦੀ ਟੀ.ਆਰ.ਪੀ ਵਧੀ ਤਾਂ ਦੂਜੇ ਚੈਨਲਾਂ ਨੇ ਵੀ ਅਜਿਹੇ ਹੀ ਪ੍ਰੋਗਰਾਮ ਸ਼ੁਰੂ ਕਰਨ ਦੀ ਸੋਚੀ।ਫਲਸਰੂਪ ਚੈਨਲ ਤਾਂ ਦਰਸ਼ਕਾਂ ਨੂੰ ਆਪਣੇ ਨਾਲ ਜੋੜਨ ਵਿੱਚ ਕਾਮਯਾਬ ਹੋ ਗਏ ਪਰ ਇਨਾਂ ਨੇ ਪੂਰੇ ਸਮਾਜ ਦਾ ਬੇੜਾ ਗਰਕ ਕਰ ਦਿੱਤਾ।ਕੀ ਆਪਣੇ ਦਰਸ਼ਕਾਂ ਦੀ ਗਿਣਤੀ ਵਧਾਉਣ ਦੀ ਖਾਤਿਰ ਪੂਰੇ ਸਮਾਜ ਦੀਆਂ ਬੇੜੀਆਂ ਵਿੱਚ ਵੱਟੇ ਪਾਉਣਾ ਜਾਇਜ਼ ਹੈ?
ਸਵੇਰ ਵੇਲੇ ਹੀ ਦਿਨ ਦੇ ਰਾਸ਼ੀਫਲ ਨੂੰ ਸੁਣ ਕੇ ਆਦਮੀ ਦੇ ਦਿਮਾਗ ਵਿੱਚ ਕਈ ਤਰਾਂ ਦੇ ਵਿਚਾਰ ਆਉਣ ਲੱਗ ਜਾਂਦੇ ਹਨ।ਜਿਨਾਂ ਦਾ ਸਾਡੇ ਦਿਮਾਗ ਤੇ ਕਾਫੀ ਡੂੰਘਾ ਮਨੋਵਿਗਿਆਨਿਕ ਅਸਰ ਹੁੰਦਾ ਹੈ।ਫਿਰ ਸਾਨੂੰ ਇੰਝ ਹੀ ਮਹਿਸੂਸ ਹੋਣ ਲੱਗ ਜਾਂਦਾ ਹੈ ਕਿ ਰਾਸ਼ੀਫਲ ਸਹੀ ਸੀ।ਕਿਉਂਕਿ ਜੇ ਤਾਂ ਰਾਸ਼ੀ ਸਹੀ ਹੁੰਦੀ ਹੈ ਤਾਂ ਫਿਰ ਅਸੀਂ ਦਿਨ ਭਰ ਦੇ ਕੰਮਾਂ ਨੂੰ ਸਕਾਰਾਤਮਕ ਤਰੀਕੇ ਨਾਲ ਦੇਖਣਾ ਸ਼ੁਰੂ ਕਰ ਦਿੰਦੇ ਹਾਂ ਤੇ ਜੇ ਰਾਸ਼ੀਫਲ ਠੀਕ ਨਹੀਂ ਆਉਂਦਾ ਤਾਂ ਫਿਰ ਇਸਦਾ ਅਜਿਹਾ ਅਸਰ ਸਾਡੇ ਦਿਮਾਗ ਤੇ ਪੈਂਦਾ ਹੈ ਕਿ ਸਾਰੀਆਂ ਚੀਜ਼ਾਂ ਪ੍ਰਤੀ ਸਾਡਾ ਨਜ਼ਰੀਆ ਹੀ ਗਲਤ ਬਣ ਜਾਂਦਾ ਹੈ।
ਟੀ ਵੀ ਚੈਨਲਾਂ ਨੂੰ ਇਹਨਾਂ ਪ੍ਰੋਗਰਾਮਾਂ ਸਦਕਾ ਕਾਫੀ ਕਮਾਈ ਹੁੰਦੀ ਹੈ ਇਸ ਲਈ ਸ਼ਾਇਦ ਚੈਨਲਾਂ ਵਾਲੇ ਤਾਂ ਇੰਝ ਹੀ ਕਰਦੇ ਰਹਿਣਗੇ।ਪਰ ਜੇ ਦਰਸ਼ਕ ਹੀ ਸਮਝਦਾਰ ਹੋ ਜਾਣ ਤਾਂ ਫਿਰ ਅਜਿਹੇ ਪ੍ਰੋਗਰਾਮ ਜ਼ਿਆਦਾ ਦੇਰ ਚੱਲ ਨਹੀਂ ਸਕਣਗੇ।ਭੋਲੇ ਭਾਲੇ ਦਰਸ਼ਕਾਂ ਨੂੰ ਤਾਂ ਇਹ ਵੀ ਪਤਾ ਨਹੀਂ ਹੁੰਦਾ ਕਿ ਅਜਿਹੇ ਪ੍ਰੋਗਰਾਮ ਕਈ ਮਹੀਨੇ ਪਹਿਲਾਂ ਹੀ ਰਿਕਾਰਡ ਕੀਤੇ ਹੁੰਦੇ ਹਨ।
ਇਸ ਬੀਮਾਰ ਮਾਨਸਿਕਤਾ ਵਿੱਚ ਫਸੇ ਕਈ ਨਾਮੀ ਗਰਾਮੀ ਕ੍ਰਿਕੇਟ ਖਿਡਾਰੀਆਂ ਨੂੰ ਵੀ ਵੇਖਿਆ ਜਾ ਸਕਦਾ ਹੈ।ਇਸ ਸਮੇ ਭਾਰਤ ਵਿੱਚ ਕ੍ਰਿਕੇਟ ਦੇ ਦੀਵਾਨਿਆਂ ਦੀ ਵੀ ਕੋਈ ਕਮੀ ਨਹੀਂ ਹੈ।ਸੋ ਕੁਲ ਮਿਲਾ ਕੇ ਸਟਾਰ ਕ੍ਰਿਕੇਟਰ , ਖਿਡਾਰੀਆਂ ਲਈ ਪ੍ਰੇਰਨਾ ਦਾ ਸਰੋਤ ਬਣ ਜਾਂਦੇ ਹਨ ਤੇ ਫਿਰ ਇਹ ਸਾਰੇ ਉਂਝ ਹੀ ਕਰਨ ਦੀ ਸੋਚਦੇ ਨੇ ਜਿਵੇਂ ਉਨਾਂ ਦਾ ਰੋਲ ਮਾਡਲ ਕਰਦਾ ਹੈ।ਭਾਵ ਸਟਾਰ ਕ੍ਰਿਕਟਰ ਕਈ ਵਾਰ ਜੋਤਸ਼ੀਆਂ ਦੇ ਕਹਿਣ ਤੇ ਆਪਣੀ ਟੀ ਸ਼ਰਟ ਦਾ ਨੰਬਰ ਬਦਲਦੇ ਨੇ,ਕਦੀ ਨੰਬਰ 99 ਰੱਖਿਆ ਜਾਂਦਾ ਹੈ ਤੇ ਕਦੀ 10।ਇਸ ਤਰਾਂ ਇਨਾਂ ਖਿਡਾਰੀਆਂ ਨੂੰ ਚਾਹੁਣ ਕਰਨ ਵਾਲੇ ਦਰਸ਼ਕ ਵੀ ਅਜਿਹੀਆਂ ਗੱਲਾਂ ਵਿੱਚ ਯਕੀਨ ਕਰਨ ਲੱਗ ਜਾਂਦੇ ਹਨ।ਪਰ ਸੋਚਣ ਵਾਲੀ ਗੱਲ ਹੈ ਕਿ ਜੇ ਨੰਬਰ ਬਦਲਣ ਨਾਲ ਹੀ ਸਭ ਕੁਝ ਹੋ ਜਾਂਦਾ ਹੋਵੇ ਤਾਂ ਫਿਰ ਘੰਟਿਆਂ ਬੱਧੀ ਪ੍ਰੈਕਟਿਸ ਕਰਕੇ ਪਸੀਨਾ ਵਹਾਉਣ ਦੀ ਕੀ ਲੋੜ।ਇੰਝ ਤਾਂ ਭਾਰਤੀ ਕ੍ਰਿਕੇਟ ਟੀਮ ਨੂੰ ਕਦੇ ਹਾਰਨਾ ਹੀ ਨਹੀਂ ਚਾਹੀਦਾ।ਪਰ ਅਜਿਹਾ ਨਹੀ ਹੁੰਦਾ ਤੇ ਕਈ ਵਾਰ ਨੰਬਰ ਬਦਲਣ ਵਾਲੇ ਖਿਡਾਰੀ ਵੀ ਜ਼ੀਰੋ ਤੇ ਆਊਟ ਹੋ ਜਾਂਦੇ ਹਨ ਤੇ ਕਦੀ ਨੱਬਿਆਂ ਦੀ ਲਾਈਨ ਵਿੱਚ।
ਪਰ 21 ਸਦੀ ਵਿਗਿਆਨਕ ਤੇ ਤਕਨੀਕੀ ਸਦੀ ‘ਚ ਵੀ ਅਫਸੋਸ ਨਾਲ ਕਿਹਾ ਜਾ ਰਿਹਾ ਏ ਕਿ ਸਾਡਾ ਸਮਾਜ ਇੰਨੀ ਹਿੰਮਤ ਨਹੀ ਰੱਖਦਾ ਕਿ ਜੋਤਿਸ਼ ਦੇ ਖਿਲਾਫ ਜਾ ਕੇ ਸੋਚ ਸਕੇ।ਕਿਉਂਕਿ ਜੋਤਸ਼ੀਆਂ ਨੇਂ ਸਾਨੂੰ ਡਰਾ ਹੀ ਇਸ ਕਦਰ ਰੱਖਿਆ ਹੈ।ਅੱਜ ਦੇ ਸਮਾਜ ਨੂੰ ਲੋੜ ਹੈ, ਇਨਾਂ ਜੋਤਸ਼ੀਆਂ ਦੇ ਸੰਸਾਰ ਨੂੰ ਛੱਡ ਉਸ ਵੱਖਰੇ ਸੰਸਾਰ ਦੀ ਹੋਂਦ ਨੂੰ ਪਛਾਨਣ ਦੀ ਜਿਸ ਵਿੱਚ ਨਾ ਤਾਂ ਭੂਤਾਂ ਪ੍ਰੇਤਾਂ ਦਾ ਡਰ ਹੈ ਅਤੇ ਨਾ ਹੀ ਮਰਨ ਤੋ ਬਾਅਦ ਨਰਕ ਅਤੇ ਸਵਰਗ ਦਾ। ਸੱਚਮੁੱਚ ਉਸ ਸੰਸਾਰ ਵਿੱਚ ਜੀਊਣ ਦਾ ਇੱਕ ਅਲੱਗ ਹੀ ਨਜ਼ਾਰਾ ਆਉਂਦਾ ਹੈ। ਜੇ ਯਕੀਨ ਨਹੀਂ ਤਾਂ ਇੱਕ ਵਾਰ ਅਜ਼ਮਾ ਕੇ ਜ਼ਰੂਰ ਵੇਖੋ.............!

Inderdeep Singh ‘Mirza’
VPO-Bhangala
Tehsil-Mukerian
District-Hoshairpur
98555-77954
01883-233169